Úthverfa

Úthverfa einkennist af áberandi virkni í samskiptum við umheiminn.

Úthverft fólk nýtur þess að vera innan um aðra, er fullt af orku og upplifir oft jákvæðar tilfinningar. Það er gjarnan áhugasamt og athafnasamt og líklegt til að segja „Já!“ eða „Komum!“ þegar spennandi tækifæri bjóðast. Í hópum vill það tala, láta til sín taka og vekja á sér athygli.

Innhverft fólk skortir fjörið, orkuna og athafnasemina sem einkennir úthverft fólk. Það er gjarnan hljóðlátt, hógvært, yfirvegað og heldur sig til hlés í félagslífinu. Þessa litlu félagslegu þátttöku ætti ekki að túlka sem feimni eða þunglyndi; innhverft fólk þarf einfaldlega minni örvun en úthverft fólk og kýs frekar að vera eitt.

Sjálfstæði og hlédrægni innhverfs fólks er stundum mistúlkuð sem óvinsemd eða hroki. Í raun leitar innhverf manneskja sem skorar hátt á Samvinnuþýði ekki eftir félagsskap annarra en er afar viðkunnanleg þegar leitað er til hennar.

Vinsemd

Vinalegt fólk hefur einlæglega gaman af öðru fólki og sýnir öðrum jákvæðar tilfinningar opinskátt. Það eignast vini fljótt og á auðvelt með að mynda náin og innileg tengsl. Þeir sem skora lágt á vinsemd eru ekki endilega kaldir og fjandsamlegir, en þeir leita ekki til annarra og eru álitnir fjarlægir og fáskiptnir.

Hópsækni

Hópsæknu fólki finnst félagsskapur annarra örvandi og gefandi. Það nýtur spennunnar sem fylgir mannfjölda. Þeim sem skora lágt finnst mannfjöldi yfirþyrmandi og forðast hann því markvisst. Þeim leiðist ekki endilega að vera innan um fólk af og til, en þörf þeirra fyrir næði og tíma út af fyrir sig er mun meiri en hjá þeim sem skora hátt á þessum kvarða.

Ákveðni

Þeir sem skora hátt á ákveðni vilja láta í sér heyra, taka stjórnina og stýra því sem aðrir gera. Þeir eru gjarnan leiðtogar í hópum. Þeir sem skora lágt tala yfirleitt lítið og láta aðra stjórna því sem hópurinn tekur sér fyrir hendur.

Virknistig

Virkir einstaklingar lifa hröðu og annasömu lífi. Þeir fara hratt yfir, af krafti og orku, og taka þátt í fjölmörgu. Fólk sem skorar lágt á þessum kvarða fer sér hægar og lifir rólegra og afslappaðra lífi.

Spennuleit

Þeim sem skora hátt á þessum kvarða leiðist fljótt án mikillar örvunar. Þeir elska skær ljós og ys og þys. Þeir eru líklegir til að taka áhættu og sækjast eftir spennu. Þeim sem skora lágt finnst hávaði og læti yfirþyrmandi og þeir eru fráhverfir spennuleit.

Glaðværð

Þessi kvarði mælir jákvætt skap og jákvæðar tilfinningar, ekki neikvæðar tilfinningar (sem heyra undir þáttinn Tilfinninganæmi). Einstaklingar sem skora hátt á þessum kvarða upplifa að jafnaði margvíslegar jákvæðar tilfinningar, svo sem hamingju, eldmóð, bjartsýni og gleði. Þeir sem skora lágt eru síður gefnir fyrir slíka orku og kátínu.